ក្រុមហ៊ុនអាកាសចរណ៍ហុងកុង ចែកសំបុត្រយន្តហោះ ៨០,០០០ ដល់ប្រទេសតំបន់អាស៊ីអាគ្នេយ៍រួមទាំងកម្ពុជា
ហុងកុង៖ ក្រុមហ៊ុនអាកាសចរណ៍ Cathay Pacific ដែលមានមូលដ្ឋាននៅហុងកុងបានប្រកាសព័ត៌មានលម្អិតអំពីវិធីសាស្រ្តនៃការចូលរួមកម្មវិធីកម្សាន្តដើម្បីទទួលបានឱកាសឈ្នះសំបុត្រយន្តហោះ ដែលក្រុមហ៊ុនបានធ្វើការផ្តល់ជូនរហូតដល់ ៥០០,០០០សំបុត្រ ដែលជាការចាប់ផ្តើមនូវយុទ្ធនាការ "Hello Hong Kong" ដែលជាផ្នែកមួយនៃការស្វាគមន៍ភ្ញៀវទេសចរណ៍មកកាន់ដែនដីនេះសាជាថ្មី។
ក្នុងចំណោមសំបុត្រចំនួន ៥០០,០០០សន្លឹកនេះ មានសំបុត្រចំនួន ៨០,០០០សន្លឹកត្រូវបានផ្តល់ឱ្យមកកាន់បណ្តាប្រទេសអាស៊ីអាគ្នេយ៍ ក្នុងយុទ្ធនាការមួយដែលគេឱ្យឈ្មោះថា World of Winners នឹងចាប់ផ្តើមនៅក្នុងតំបន់អាស៊ីអាគ្នេយ៍ពីថ្ងៃទី០១ ទី០២ និងទី០៣ ពីប្រទេសថៃ សិង្ហបុរី និងហ្វីលីពីន មុននឹងបន្តយុទ្ធនាការនៅក្នុងប្រទេសម៉ាឡេស៊ី ឥណ្ឌូណេស៊ី វៀតណាម និងកម្ពុជា តាមកម្មវិធីជាបន្តបន្ទាប់។
ដើម្បីទទួលបានសំបុត្រនេះ អ្នកគាំទ្រត្រូវតែជាសមាជិកនៃក្រុមហ៊ុន Cathay ដែលចុះឈ្មោះតាមវេបសាយក្រុមហ៊ុន ព្រមទាំងចូលរួមឆ្លើយសំណួរនៅតាមពេលវេលាដែលកម្មវិធីបានបើកតាមបណ្តាប្រទេសនីមួយៗ។ ជាក់ស្តែង នៅកម្ពុជា យុទ្ធនាការផ្តល់សំបុត្រយន្តហោះពីក្រុមហ៊ុនហុងកុងនេះនឹងចាប់ផ្តើមនៅថ្ងៃទី១៨ ខែមីនា និងបិទបញ្ចប់ព្រមទាំងប្រកាសអ្នកឈ្នះនៅថ្ងៃទី០៥ ខែមេសា៕